SISD – BAIRROPITE, 22 JULLU 2026 – Xefi Suku Bairropite Joaninha Alves Soares ba Ekipa Sentru Informasaun Suku Dijital Bairropite, Tersa (21/07) semana ne’e hateten projetu konstrusaun dapur merenda eskolar iha Escola Ensinu Bazico Filial no 4 Fatumeta atinji ona pursentu limanulo.
Xefi Suco ne’e haktuir projeitu konstrusaun ba dapur merenda eskola ne’e, finansia husi Programa Nasional Dezenvolvimentu Suku (PNDS) ne’ebe maka to’o oras ne’e sei kontinua hala’o.
“Projetu ida ne’e mai husi nesesidade no prioridade ne’ebé durante ne’e Xefe Aldeia sira kontinua hato’o iha enkontru regular ho Xefe Suku, liuliu kona-ba melhoramentu infraestrutura edukasaun. Tanba ne’e, komunidade hamutuk diskute no submete proposta, ikus mai hetan aprovasaun husi Munisípiu Díli atu implementa projetu dapur merenda eskolar foun” Tenik Lideransa Suku Bairro-Pite.
Lideransa Suco ne’e hateten konstrusaun ba dapur merenda escolar ne’e seo fo’o benefisiu boot tanba atu garante preparasaun hahán ba estudante sira ho padraun ijeniiku no seguransa, hodi proteje saúde labarik sira no asegura katak dapur tuir padraun ne’ebé Governu estabelese.
“Labarik sira tenki hetan hahán ne’ebé di’ak no seguru, tanba ne’e, dapur tenki tuir padraun no ema hotu presiza hamutuk kuida fasilidade ne’e,” Joaninha hateten.
Xefe Suku mos husu ba komunidade tomak atu asegura implementasaun projetu ne’e lao tuir planu. Tanba bainhira suku ida implementa projetu ho susesu no tuir regra, sei fó oportunidade ba alokasaun orsamentu iha futuru. Maibé karik projetu la ezekuta ho di’ak, orsamentu ne’ebé la uza sei fila fali ba Kofre Estadu.
Relasiona ho pagamentu ba emprezariu, Xefe Suku ne’e hateten mekanizmu PNDS klaru tanba pagamentu dahuluk foin bele halao bainhira progresu servisu to’o pursentu ruanulo resin lima (25%), iha pagamentu daruak nian sei halao bainhira pregresu kongtrusaun atinji ona ba pursentu hitunulo resin lima (75%), no pagamentu ba faze ikus nian sei bele halo bainhira projetu ne’e finaliza ona ho pursentu atus ida (100%), ida ne’e tuir padraun no rezultadu ne’ebé determina ona.
Iha sorin seluk Jeronimo Jose Tilman, pessoal PNDS Suku Bairro-Pite esplika projeitu konstrusaun ba dapur merenda escolar iha Escola Ensinu Bazico Filial no 4 Fatumeta ne’e, nain maka Ministeriu Edukasaun no implementa husi Programa Nasional Desenvolvimentu Suco (PNDS).
“Objektivu husi Konstrusaun ne’e, atu hakbi’it liu tan kualidade ba programa Merenda Eskolar ne’ebe implementa husi Ministerio Edukasaun. Projetu refere nain mak Ministeriu Edukasaun no implementa husi PNDS no prosesu tomak lao tuir matadalan aprovisionamentu ne’ebe mak regula PNDS”. Dehan Tilman.
Atualmente projetu konstrusaun dapur merenda eskolar iha EBF No. 4 Fatumeta kontinua lao no tuir planu konstrusaun ba dapur merenda escolar ne’e sei finaliza iha Tinan ida ne’e.
Hakerek Nain : Ekipa SISD Bairropite
Editor : Ekipa Formador JPD – SEKOMS
